Қоғамның дамуы адам еңбегінің жемісі. Сондықтан еңбек адамы әрқашан қадірлі. Президент әрбір Жолдауында мемлекеттің басты байлығы – адам капиталы екенін әрдайым айтып келеді. Елімізді мекендеген көптеген ұлттардың еңбек етіп, тату-тәтті тіршілік кешуі Мемлекет басшысының парасатты саясатының арқасында іске асып жатқан жұмыстардың жемісі деуге болады. Тек мереке күндері ғана емес, жыл бойы үлкен кісілерді қуанышқа бөлеп, құрмет көрсету әр азаматтың қолынан келеді. Сондықтан, өмір бойы осы елде еңбек етіп, мемлекеттің дамуына үлес қосқан әрбір жан, әрбір ұлттың өкілі қоғам назарынан тыс қалмауы керек.
Осы ретте ІІІ Интернационал ауылдық округінің әкімі Нұрлыбек Сайымов және ардагерлер кеңесінің төрағасы Сайлау Мұхтаров пен әйелдер кеңесінің төрайымы Гүлбарам Тоғаевалар үлкенді сыйлаудың үлгісін көрсетті. Олар саналы ғұмырларын ауылдың әлеуметтік экономикалық дамуына арнаған Любовь Огай, Өтеп Төлегенов, Рысты Әбенова, Камал Жүнісов, Ділдаш Орынбаева және Мурадин Мардиев сынды ардагерлердің шаңырағына барып сәлем беріп, жағдайларын білді.
Ауыл әкімі қазыналы қарттармен әңгімелесіп ұзақ ғұмыр, зор денсаулық тілеп, тәттілер табыстады. Ардагерлер де көрсетілген құрметке риза болып, баталарын берді.