Құрбан айттың негізгі мақсаты – Алла разылығы үшін құрбандыққа мал шалу. Ең алдымен құрбандық шалудың мәнісін кеңінен ұғынып, құлшылықтың не үшін жасалатынын жақсы білген жөн. Сонымен қатар Құрбан шалу – Құдайға жақын болу үшін, күнәлар кешірілу үшін, шүкір ету үшін жасалуы міндетті.

Діни дәстүрге сай аудандағы «Қармақшы ата» және «Ораз ахун» мешіті ұлық мерекені атап өтті. Азанғы сағат 6-да жамағат айт намазын оқып, Жаратқанға құлшылық жасады. Мұнан соң мешіт жамағаты бірігіп 3 ірі қара малды құрбандыққа шалды. Ал оның етін тұрмысы төмен және көп балалы отбасыға үлестірді. Сонымен қатар құрбандық шалуға ниет еткен жандар да мешітке келіп малын шалды.

Ұлық мереке құрбандық шалумен ғана шектелмейді. Онда адамның ішкі ниеті, шын пейілі, тақуалығы, басқаларға жанашырлығы таразыға түседі. Сондай-ақ пенденің пендешілігі мен мәрттігі, сараңдығы мен жомарттығы да сыналады. Барша мұсылман жұртшылығын бір-біріне жанашыр болуға, қамқорлық жасауға, өзара мейірімді болуға шақырады.

Естеріңізде болса ақпан айында Қазақстан Мұсылмандар Діни Басқармасы «Зекет корпоративтік қоры» Қармақшы ата мешіті «Ел үлесі пәтерге» жобасы басталған-ды. Онда мешіт жамағаттары және «Жосалының жомарт жандары» атты челленджде ел ағалары өз үлестерін қосты. Міне, қасиетті Құрбан айтта «Ақтілек» мейрамханасында аудан әкімі Әділбек Ерсұлтанов көп балалы отбасы Сәулебек Қамысбаевқа баспана кілтін табыстады.