Аудан әкімі Әділбек Бөрібайұлы Жосалы кентіндегі білім ошақтарын аралап, жөндеу жұмыстарымен танысты.

Алдымен кент орталығындағы Омар Шораяқұлы атындағы №30 орта мектепке барып, жылу жүйесін табиғи газға ауыстыру жұмысын қадағалады. Атап өту керек, мектептің жылу жүйесін сұйық отыннан сұйытылған газге ауыстыру үшін «Ауыл – Ел бесігі» жобасы аясында 85098,8 мың теңге қаржы бөлінген. Бүгінгі таңда жеңімпаз мердігер анықталып, аталмыш жұмыстарды жүргізуді бастады.

Аудан әкімі Ә.Ерсұлтанов әрі қарай №121 орта мектебінде жүргізіліп жатырған күрделі жөндеу жұмыстардың барысын бақылады. Жөндеу жұмыстарын жауапты мердігермен жасалған келісім-шартқа сәйкес 29 желтоқсанда аяқтау белгіленген. Дегенмен, аудан басшысы тиісті мекемелерге биылғы балалар жылына орай оқушылардың білім алуына қолайлы жағдай жасау үшін жөндеу жұмыстарын Білім күніне дейін аяқтауды тапсырды. Сондай-ақ, білім беру саласын жетілдіруге үнемі қолдау көрсететінін жеткізді.