«Бір қозы туса, бір түп жусан артық өседі» деген тәмсілді ұстанған қазақ әр сәбидің өз несібесімен дүниеге келетінін айтады. Перзентін көңілдің гүлі, көздің нұрына теңеп, жүрек түкпіріндегі үлкен үміттерінің иесі санайды. Сондықтан 1 маусымда тойланатын Халықаралық балаларды қорғау күні – орны ерек, мәні бөлек мереке.

Аталған мерекеге орай ауыл әкімі Нұрлыбек Сайымов ардагерлер және шаруашылық басшыларымен бірге округтегі "Достық", "Бадинур" балабақшаларына және үйден әлеуметтік қызмет көрсетілетін балалардың шаңырағына барып мерекелерімен құттықтады. Ауыл әкімі елімізде балалардың көңілдерін кір шалмай, алаңсыз оқу оқып, балалық балғын шақтарын бақытты өткізу үшін барлық жағдайлар жасалып отырғандығын атап өтіп, балаларға мықты денсаулық, мол бақыт тілеп, ойыншықтар мен тәттілерді үлестірсе, ардагерлер кеңесінің төрағасы балаларға ақ батасын берді.

Сондай ақ, бұл күні орталық алаңда «Бала бақыты бәрінен биік» атты мерекелік іс-шара ұйымдастырылды. Жиында балабақша тәрбиеленушілері мен жас өнерпаздар ән айтып, би билеп өз өнерлерімен жиналған қауымның ыстық ықыласына бөленді. Мерекелік шара соңында барлық балаларға тегін балмұздақ пен тәттілер таратылды.