Енді дүкендердегі тауарлардың сапа сертификатын үйден тексеруге болады
Енді ел дүкендерінде тұрған тауарлардың сапа сертификатының бар-жоғын үйден шықпай-ақ, тексеруге болады.
Мұны бүгін Инвестиция және даму министрлігінің Техникалық реттеу және метрология комитетінің басшысы мәлім етті. Мұндай мүмкіндік техникалық реттеу, стандарттау мен метрология жұмыстарының нәтижесі бір платформаға біріктіріліп, бірыңғай электронды жүйе іске қосылғанда тумақ. Әзірге «Стандарттау суралы» заң жобасы екінші оқылымға дайындалып жатыр. Дерекқор базасы Комитеттің порталында орналастырылып, барлық ғаламтор пайдаланушыларына қолжетімді болмақ.
Ғалымжан Дұғалов, ҚР ИДМ Техникалық реттеу және метрология комитетінің басшысы:
– Өнімдердің импорттық болса да, отандық шығарушы өнімдері болса да сапасын тексеруге болады. Біздің «Е-КТРМ-ге» кіріп, қарауға болады. Өнімнің сертификаты бар ма, жоқ па, қашан берілген және кіммен берілген деген сияқты мәліметтердің бәрін тексеруге мүмкіншілік болады.
