Жат ағымдардың жарға жығатындығын барлығы білу тиіс. Ол үшін көпшіліктің деструктивтік діни ағымдарға қарсы иммунитетін ақпараттық-насихат жұмыстар арқылы қалыптастыру қажет. Бүгінде Қызылорда облыстық ішкі саясат басқармасының Дін мәселелерін зерттеу орталығы мамандары көпшілік ортада тұрғындармен, оқу орындарында студент жастармен кездесулер өткізіп, үгіт-насихат жұмыстарының қатарын арттырып келеді. Орталықтың келелі кездесулерінің легі Ақшабұлақ кенішінде жалғасты. «ҚазГерМұнай» БК ЖШС-нің мұнайшылармен жүздескен Дін мәселелерін зерттеу орталығының теолог-маманы Бақтияр Оспанов, Ақпараттық түсіндірме тобының мүшесі Сәкен Алдашбаев және «Мүсірәлі ата» мешітінің наиб имамы Боранбай Байболов жұмысшыларға дәстүрлі емес діни ағымдардан келер қауіп жайлы әңгімеледі.
Жиында Дін мәселерін зерттеу ортылығының теолог-маманы Бақтияр Оспанов жиналғандарға ҚР дін саласындағы мемлекеттік саясатының 2017-2020 жылдарға арналған тұжырымдамасын кеңінен түсіндіріп берді. Ақпараттық түсіндірме тобының мүшесі Сәкен Алдашбаев «Дін және ұлттық құндылықтардың зайырлы мемлекет қағидаттары мен үндестігі» тақырыбында баяндама жасаса, «Мүсірәлі ата» мешітінің наиб имамы Боранбай Байболов «Рухани жетілуде салт-дәстүр мен діннің рөлі» жайында әңгімеледі. Жиын соңында кеніштегі мұнайшылар дін тақырыбы аясында өздерін толғандырып жүрген сауалдарын қойып, мамандармен кеңінен сұқбаттасты.