Нұрсұлтан Назарбаевқа ескерткіш орнатылды

Ескерткіштің биіктігі – төрт метр. Қоладан жасалған мүсіннің авторы – Қазақстанның еңбек сіңірген реставраторы, Қазақстан Суретшілер одағының мүшесі Тілеуберді Бинашев.
"Ескерткіш ҚР Тұңғыш Президенті – Елбасы Н.Назарбаевтың егіс алқабында түскен фотосуретіне қарап жасалған. Түркістандағы жаңа әкімшілік-іскерлік орталығында орнатылған мүсіннің композициясында "Ұлы Даланың Ұлы" атты Елбасы ескерткішінде қарт Қаратаудың сұлбасы бейнеленген. Автор Елбасының Қаратау жазығында шексіз далаға байыппен қараған сәтін суреттеген", – деп хабарлады әкімдік.
Назарбаевқа ескерткіш қою туралы бастаманы кәсіпкер Болатбек Алиев көтеріп, аталған идеяға түркістандық ардагер-ақсақалдар, зиялы қауым өкілдері, мәслихат депутаттары мен кәсіпкерлер, қоғамдық ұйым өкілдері қолдау білдірген.
Түркістан әкімдігі осы бастама бойынша жергілікті тұрғындар арасында сауалнама жүргізді.
“Сауалнамаға 1000 респондент қатысып, олардың 93% бастаманы қолдайтындарын білдірген болса, респонденттердің 4,5% қарсы, 2,5% бейтарап позицияны ұстанған", – деп қорытындылады әкімдік.