Ескерткіштің ашылу рәсімі 18 мамырға жоспарланып отыр. 
Қазақстанның белгілі мәдениет қайраткері, музыкант Батырхан Шүкеновке арналған ескерткіш Қызылорда қаласында ашылады, деп хабарлайды BNews.kz.
Бұл туралы өзінің Facebook-тегі парақшасында Батырханның бұрыңғы продюсері, әрі директоры Олжас Байқанов жазды. Оның айтуынша ескерткіш жұмысымен Мұрат Мансұров пен Жарас Шаймерденов атты астаналық мүсіншілер айналысқан. Ол сондай-ақ көрсеткен көмегі үшін Қызылорда облысының әкімі Қырымбек Көшербаевке алғысын білдірген.
Айта кетейік, мүсіннің ресми ашылу салтанаты Оқушылар сарайы саябағында 18 мамыр күні сағат 10.30-да өтеді деп жоспарланып отыр.
Осыған дейін Қызылорда облысы әкімдігінде Батырхан Шүкеновтың ескерткішіне шамамен 38 млн теңге жұмсалатыны туралы айтылған.
Сондай-ақ Қызылордада 16 мен 18 мамыр аралығында әнші-композитор, Қазақстанның еңбек сіңірген қайраткері Батырхан Шүкеновты еске алуға арналған"Отан-Ана" атты вокалистер сайысы өтеді.