Ұлы өркениетімізден тамыр тарқан Ұлыстың ұлы күнін «Сыр медиа» серіктестігі думанды тоймен қарсы алды. Әдемі дәстүр биыл да жалғасын тапты.  Журналистермен қатар Наурыз мерекесіне ардагерлер, қонақтар шақырылып, ас төресі наурыз көже таратылды. Өнерлі жастар даланы әнге бөледі. Алтын күннен нұр, жерге алтын дән себілетін шақта күн шуақты болып, ел қуанышқа кенеліп, Наурыз тойы нағыз тойға айналды. Бірқатар қызметкерлерге облыс әкімінің алғыс хаты табысталды. Айтыс ұйымдастырылып, бөбектің тұсау кесу рәсімі өтті. Қол күресі, арқан тарту, гір тасын көтеру сынды ұлттық ойындар ойнатылып, әсіресе қымыз бен бауырсақ жеуден мешкей жарысы жұртты қайран қалдырды.