Марқұмдардың рухына Құран бағышталды

13 шілде – Ұлттық аза тұту күні. Елімізде қалыптасқан ахуалға байланысты ҚР Президенті Қасым-Жомарт Тоқаев телеарналарда үндеуін жолдап жариялады.

– Әлем бойынша індетке шалдыққандар саны 12 миллионға жетті. Оның ішінде өмірден өтіп, қайтыс болғаны қаншама. Бұл коронавирустың таралуы бәсеңдер емес. Мұндай орны толмас жағдай елімізде де тіркелуде. Әрбір азаматтың қазасы менің де жүрегіме қатты батады. Қара жамылған отбасыларға көңіл айта отырып, 13 шілдені пандемиядан қаза тапқандардың рухына Ұлттық аза тұту күні деп жариялаймын, – деді Мемлекет басшысы.

Осыған орай бүгін аудандағы барлық мекемелерде ту төмен түсіріліп, өмірден өткен жандарды бір минут үнсіз еске алды.

Сонымен қатар кент орталығындағы «Қармақшы ата» мешітінде пандемия құрбандарына арнайылап қол жайылып, Құран бағышталды.

Марқұмдардың отбасының қайғысына ортақтасып, «Алла олардың жатқан жерін жайлы, иманын саламат қылсын» деп көңіл айтамыз.