Ел болашағын бірге қорғайық

ҚР Президенті Қасым-Жомарт Тоқаев елдегі орын алып жатқан ахуалға байланысты карантиннің екінші легін жариялады. Себебі қазіргі таңда індетті жұқтырғандар саны күрт көбеюде. Бұл дегеніміз – коронавирустық инфекциясының қайта ушыққанының белгісі. Қазір өзге елдер карантин тәртібін қайта орнатып жатыр. Вирус жұқтырып, соның салдарынан қайтыс болып жатқан қаншама. Осыны ойлаған Мемлекет басшысы елді 14 күнге қатаң күшейтілген карантин режиміне жапты. Бұл шешімі құптарлық деп ойлаймын.

Кешегі жолдаған үндеуінде 13 шілдені – Ұлттық аза тұту күні деп жариялады. Рас, бұл індеттен тұра алмай, өмірден кетіп жатқан жандар аз емес. Алайда уайыммен қайғыға батып, еңсемізді түсіруге болмайды. Осындай сәтте барша ел-жұртты сабыр сақтап, індетпен бір болып күресуге мен де шақырамын. «Жұмыла көтерген жүк жеңіл» демекші мүмкіндігінше үйде отырып, кеселден қорғанайық. Той-томалақ, ас беру жиындарына барып, індет жұқтыруға себепкер болмайық. Болашағымызды, бала-шағамызды бірге ойлайық.