Мемлекет басшысы қазақстандықтарды ұлттық домбыра күнімен құттықтады
Мемлекет басшысы Қасым-Жомарт Тоқаев қазақстандықтарды ұлттық домбыра күнімен құттықтады, деп хабарлайды Stan.kz ақпарат агенттігі.
Ел президенті өзінің ақжарма тілегін ақтарып, барша халықты ұлттық мәдениетті дәріптейтін осынау киелі күнмен шын жүрегінен құттықтады.
"Құрметті отандастар! Ардақты ағайын! Сіздерді Ұлттық домбыра күнімен шын жүректен құттықтаймын! Бұл – Елбасының рухани жаңғыру жолын және салт-дәстүріміздің мән-маңызын дәріптейтін игі бастама. Қос ішекті қара домбыраның үнінде Ұлы даланың тамыры терең тарихы мен сан ғасырлық шежіресі бар. Қазақтың бекзат болмысы мен асыл қасиеттері қашанда әнмен әрленіп, күймен көмкерілген. Халқымыздың төл өнерін төрімізден түспеген домбырасыз елестету мүмкін емес. Ұлттық рухты күмбірлеген күйден артық көтеретін дүние кемде кем", - дейді Қасым-Жомарт Тоқаев.
Сонымен қатар Тоқаев домбыраның қазақ халқының өмірінде алатын орнын айқындап, ұлттық аспапты қадір тұту әр қазақтың парызы екенін жеткізген.
"Халқымыздың көрнекті ақыны Қадыр Мырза Әлі жырлағандай: «Нағыз қазақ – қазақ емес, нағыз қазақ – домбыра». Біз ұлттық аспабымыздың бүкіл әлем мойындаған мәдени құндылыққа айналғанын мақтан етеміз. Атадан балаға аманат болған осындай асыл қазынамызды қадір тұту – бәріміздің қасиетті борышымыз. Жылдан жылға домбыра тартатын жастардың қатары көбейіп келе жатқаны қуантады. Қазақтың дәстүрлі ән-күйін насихаттап жүрген барша өнерпаздарға алғыс айтамын. Домбыра мерекесі құтты болсын! Әр шаңырақтан ән-күй үзілмесін!" - дейді мемлекет басшысы.
