Рейд жұмыстары күшейтілді
ЖОСАЛЫ, 28 маусым – qarmaqshy-tany.kz Ауданда коронавирус індетін жұқтырған науқастар саны көбеюіне байланысты қоғамдық қауіпсіздікті қамтамасыз ету үшін Қармақшы аудандық полиция бөлімінде аудан әкімінің орынбасары Ж.Омаровтың төрағалығымен жиын өтті.
Жиын барысында аудан әкімінің орынбасары дүкендерде қызметкерлердің маскасыз жүруі, қолғапсыз қызмет көрсетуі, дезинфекция құралдарын пайдаланбауы, қоғамдық жерлерде арақашықтық сақталмауы әлі де кездесетінін және осы себептен дертке шалдығушылар саны артып отырғандығын айтты.
Осыған байланысты, полиция қызметкерлеріне әкімшілік қызметкерлерімен бірлесіп жергілікті кәсіпкерлік нысандар мен халық көп шоғырланатын орындарға күнделікті үздіксіз рейд жүргізуді тапсырды.
«Сауда нысанына 2 сағат сайын дезинфекциялау жұмыстарын жүргізу керек. Сатушылар да үнемі маска мен қолғапты тастамауы тиіс. Тұтынушылар да бетпердемен келіп, кейбір заттарды арнайы қаптамамен алуы қажет.
Халық денсаулығына бейжай қарамаймыз, бұл түсіндіру жұмыстарын күшейтуіміз керек. Талапты орындамай берілген ескертулерді елемегендер болса әкімшілік шара қабылданады» - деді Ж.Омаров.
Осы ретте, аудан тұрғындарын аурудан қорғану мақсатында үнемі маска мен қолғап киюге, қорғаныш құралдарын ылғи пайдалануға, қоғамдық орындарда арақашықтық сақтауға, өзінің және жақындарының денсаулығын ойлауға шақырамыз.
