Қанибай Айтымбетов: Карантин режимі әлі де сақталады
Кеше Төтенше жағдай режимін қамтамасыз ету жөніндегі мемлекеттік комиссияның қорытынды отырысы өткені белгілі. Онда президент Қасым-Жомарт Тоқаев елдегі жарияланған төтенше жағдай режимінің аяқталғанын, десе де карантиндік режимнің сақталуын тапсырды. Елде бұрын-соңды болмаған осынау күрделі жағдайда мемлекет өз тарапынан қолдау білдіруде. Оның ішінде кәсіп иелеріне ерекше басымдық берілуде. Себебі бизнес иелері – экономиканың ең қозғаушы күші. Елдегі қазіргі ахуал мемлекет экономикасына кері әсерін тигізбей қоймасы анық. Осы ретте олқылықтың орнын толтырып, кәсіптің тежелмеуі үшін салық төлемдеріне жеңілдік жасалды. Табыссыз қалғандарға да мемлекет тарапынан қолдау көрсетілуде. Төтенше жағдай тоқтады деп, еркінсіп кетпей, дерттің дендемеуіне үлес қосуымыз шарт. Әлде де болса сабырлық танытып, өзіміз үшін ақырын байыппен күткеніміз абзал.Сондай-ақ бүгінгі отырыста дағдарып қалған ел экономикасын қалпына келтіру жолдарына арналған жоспар да ортаға салынды. Мақсаты айқын, қолдауға тұрарлық жобалар назарға алынған. Баршамыз қойылған тәртіпке бағынсақ, еліміздің бұрынғы жаймашуақ күндері де алыс емес секілді.
