Кәсіпкерлер назардан тыс қалған жоқ

   Елде төтенше жағдай жариялаған күннен бастап Мемлекет басшысы халықтың денсаулығына алаңдап, өз мәлімдемесін жолдап отырды. Жедел қабылдаған шешімдердің арқасында індет айтарлықтай асқынбады деуге болады. Десе де халыққа үндеуінде коронавирусқа жеңіл-желпі қарауға болмайтынын айтып, карантин талаптарынан бас тартсақ дертті қайтадан өршітіп алуымыз ықтимал екенін ескертті. Соңғы мәлімдемесінде елдегі ахуалды негізге ала отырып, төтенше жағдай режимін 11 мамырға дейін ұзартты. Бірақ карантин талаптары біршама жеңілдетілетінін айтып өтті.

   Қазір барлық жерде кәсіпорындар тоқтап тұр. Шағын және орта бизнес өкілдері күрделі жағдайға тап болды. Осыған орай Қазақстан Республикасының Президенті Қасым-Жомарт Тоқаев ел экономикасын құлдыратпау мақсатында кәсіпкерлерге несие беру үшін қаражат бөлді. Несиесі барларға кейін төлеуге мүмкіндік берді. Онымен қоса 3 ай мерзімге салық төлеуден босатты. Осы жеңілдік кәсіпкерлердің еңсе тіктеуіне жақсы жағдай екені анық.