Қызылордада коронавирустан тағы 2 адам жазылды
Қызылорда облысында коронавирус инфекциясынан 15 сәуірде тағы 2 адам айығып шықты, деп хабарлайды ҚазАқпарат.
Бұл жөнінде Қызылорда облыстық денсаулық сақтау басқармасы мәлім етті.
«Олардың емі толық аяқталды. Науқастардан 2 рет тест сынамасы алынды. Сынама нәтижесі олардың сау екенін көрсетті. Науқастар коронавирус инфекциясынан толық айықты деген қорытынды жасалды. Олар облыстық жұқпалы аурулар ауруханасынан үйлеріне шығарылады. Індетті жеңген 2 науқас та Қызылорда қаласының тұрғыны. Емделушілер алдағы уақытта 14 күн бойы аймақтық дәрігерлер бақылауында болады», - деп мәлім етті ведомстводан.
Айта кетейік, облысымызда бұған дейін 2 науқас аталған індеттен айыққан болатын. Қазір барлығы 4 науқас коронавирус инфекциясынан жазылып шыққан.
Бүгінгі таңда Қызылорда облысында коронавирус инфекциясы қойылған 127 адам бар.
