Кітапхана қызметкерлері балабақшада
Аудандық балалар кітапханасының қызметкерлері "Ханшайым-2" балабақшасына барып Мамандар күнін өткізді. Кітапхана дүниеде ештеңе теңестірілмейтін білім бұлағының көзі екенін, ғасырдан-ғасырға адамзат тарихының керуенін сүріндірмей әкеле жатқан шырағы биік, парасаттылық пен білімділіктің, біліктіліктің киелі ордас екені түсіндірілді.
Балабақша қызметкерлеріне балаларды көптеген ертегі кітаптармен, журналдармен қызықтыруға болатынын, бала уақытын тиімді өткізу керектігі айтылды. Соның ішінде тәрбиеші мамандығына тікелей қатысты "Отбасы және балабақша" журналы толықтай түсіндірілді.
"Отбасы және балабақша" журналында мектепке дейінгі тәрбиенің бастауы, баланың жеке тұлға болып қалыптасуы жайлы, мектепке дейінгі бала тілін дамыту, көп тілді білу, қиын баламен қалай жұмыс жасау керегі туралы мәліметтер бар. Журналдың әр басылымында көптеген тақырыпта іс-шаралардың сценарийлері бар. Яғни, бұл журналды қысқаша айтқанда тәрбиешілерге тәжірибе алмасу құралы екені айтылды.
Бұдан басқа да "Қазақ тілі мен әдебиеті", "Бастауыш мектеп", "Айгөлек", "Балдырған" журналдарымен, "Жасыл жанып тұрғанда", "Қазақ тілі", "Әріптер", "Тәрбие жұмысының теориясы және ұйымдастыру әдістемесі" кітаптарымен және көптеген ертегі кітаптарымен "Ханшайым-2" балабақшасының қызметкерлері танысты.
