Түріктер картон қаптамалар зауытын салуға Қазақстаннан серіктес іздеуде
Қызылорда облысы кәсіпкерлер палатасында түріктің «Чукурова Холдинг» компаниясының бас директоры Доанлы Иса, жоспарлау және сату жөніндегі директор Токатлы Камиль Мехмед, Куру Бора аймақ кәсіпкерлерімен кездесті, деп хабарлады ҚазАқпарат тілшісі.
Компания түрлі саладағы тауарлардың қаптамасын шығарумен айналысатын Түркиядағы жетекші кәсіпорындардың бірі. Бүгінде аталмыш түріктік компания балғын жемістер мен көкөністерге, қатты және сұйық майларға, ет, балық, жұмыртқа, сусындар мен химиялық тауарлардың қаптамаларын әзірлеумен айналысады.
1976 жылдан бері белді компаниялардың өнімдеріне қамтама жасап жүрген «Чукурова Холдинг» кәсіпорны енді Қазақстанда гофрокартоннан қаптама жасайтын кәсіпорын ашпақ. Ол үшін қолайлы аумақ ретінде оңтүстік өңірлерді алып отыр.
«15-20 адам тұрақты жұмыс істейтін зауыт салмақшымыз. Алдымен жергілікті кәсіпорындардың картон қаптамаларына деген қажеттілігін анықтаймыз. Экономикалық тұрғыда тиімді болатынына сенімдіміз. Өйткені, бау-бақша, жеміс-жидек, сүт өнімдері мұнда көп әзірленеді екен. Ал қаптамалар шығаратын бірде-бір зауыт жоқ. Сондай-ақ жергілікті кәсіпкерлер шикізатқа қамысты пайдалануға болатындығын айтты. Бұны мамандармен ақылдасып, шешім қабылдайтын боламыз», - дейді «Чукурова Холдинг» компаниясының бас директоры Доанлы Иса.
Кәсіпкерлер палатасы алаңындағы кездесуде қызылордалық кәсіпкерлер жобаға қызығушылығын танытып, қажетті дайын базаны беруге әзір екендіктерін жеткізді.
Кәсіпкерлер палатасы Өңірлік кеңесінің мүшесі Төреғали Шанкерей жобаны Қызылорда облысында жүзеге асырудың артықшылықтарына тоқталып өтті.
«Зауытты Қызылордада салуда ұтатын жерлеріңіз көп. Біріншіден, Қызылорда облысы «Батыс Еуропа-Батыс Қытай» автожолының бойында орналасқан. Зауыт өнімдерін Қызылорда мен Оңтүстік Қазақстан облысы ғана емес, ар жағында Қарағанды, Тараз, бер жағында Ақтөбе облысына да кеңінен тасу, тұтынушыларды табу мүмкіндіктері зор», - деді ол.
