2019 жылдың қаңтар айынан бастап тіркелмеген телефондар үшін байланыс қызметтері көрсетілмейтін болады. Көптеген тұтынушылар ұялы телефон операторлары бөлімшелеріне жүгінгісі келмейді. Сондықтан бүгінде электрондық-цифрлы қолтаңба, SMS немесе USSD-командалар арқылы онлайн тіркеудің баламалы жолдары қарстырылуда. Бұл туралы Ақпарат және коммуникация министрі Дәурен Абаев «Казахстанская правда» газетіне берген сұхбатында айтты.

– БАҚ туралы заңның жүзеге асырылуы бойынша күрделі мәселелер жоқ. Міндетті сәйкестендіруге қатысты біз «пікір білдірген» интернет-ресурс басшыларының барлығымен кездесіп сөйлестік. Қажет жұмысты олар жақын уақытта атқарып бітеді. Бұл тұрғыдан бір реттік SMS-құпиясөз арқылы тіркеу ыңғайлы болып тұр, - деді Абаев.

Министр IMEI-кодтарды тіркеу туралы шешім экстремизм және терроризммен күресті күшейту аясында 2016-ші жылы енгізілгенін атап өтті.

– IMEI-код ұялы телефон иесін анықтауға мүмкіндік бермейді. Сондай-ақ нарықта IMEI-коды бірдей ұялы телефондар да кездесіп жатады. Бұл жағдайға байланысты бірден-бір шешім ретінде IMEI-кодты ЖСН және абонемент нөміріне байланыстыру болып отыр. Ал телефон осылайша тіркелген кезде, оны ұрлау әрекеті де мағынасыз болып қалады, – деді министр.

Министрдің айтуынша, уақытша тіркеу кезіндегідей жағдай қалыптаспас үшін бұл тәртіпті енгізуге бір жылдай уақыт бөлініп отыр.