СЫРДАРИЯДАҒЫ СУДЫҢ ДЕҢГЕЙІ БАҚЫЛАУДА

ЖОСАЛЫ, 7 желтоқсан - qarmaqshy-tany.kz Аудан әкімі М.Қалдарбеков Жосалы кенті аумағынан өтетін Сырдария өзенінің жағасын арнайы барып көрді.

Қазіргі уақытта бөгеттерді нығайту жұмыстары атқарылып, барлық жауапты мекемелерден тәуліктік кезекшілік ұйымдастырылды.

Сырдария өзені бойында әр 2-4 сағат сайын бақылау жұмыстары жүргізілуде.

Осы кезеңде Сырдария өзені бойында күр (шуга) жүруде. Қызылорда су торабынан төмен 297 шақырым, Жосалы кентінен төмен 5 шақырым «Үсентай» учаскесінде мұз әр жерден жылым болып ұстасуда.

Мамандардың айтуынша қазіргі таңда Сырдария өзені бойындағы елді мекендерді су басу қауіпі жоқ.

Орталық коммуникациялар қызметіндегі брифингте Су ресурстары комитетінің төрағасы Арман Тұрлыбектің айтуынша «Қазіргі уақытта өзендерде мұз қатып жатыр. Сырдария – трансшекаралық өзен. Оның ерекшелігі су солтүстікке қарай ағады. Оның мұз құрсауы Арал теңізі жағынан басталады. Бұл жыл сайын қайталанатын табиғи құбылыс»,- деп атап өткен болатын.