Көкжөтел ауруының алдын алу

Көкжөтел (коклюш) – тыныс алу жолдарын зақымдайтын, жұқпалы әрі өте қауіпті жұқпалы аурулардың бірі. Бұл ауру көбіне балалар арасында кездескенімен, ересектер де ауыруы мүмкін. Көкжөтелдің негізгі қауіптілігі – оның ауыр асқынуларға әкелуі және әсіресе бір жасқа дейінгі балалар үшін өмірге қатер төндіруі.

Көкжөтел Bordetella pertussis бактериясы арқылы таралады. Ауру ауа-тамшылы жолмен, яғни жөтелу, түшкіру, сөйлесу кезінде жұғады. Алғашқы кезеңде көкжөтел кәдімгі суық тиюге ұқсас болып басталады: мұрыннан су ағу, жеңіл жөтел, әлсіздік байқалады. Алайда бірнеше күннен кейін жөтел күшейіп, ұстамалы сипат алады, кейде тұншығуға дейін апарады. Балаларда жөтелден кейін құсу, тыныстың уақытша тоқтауы да кездесуі мүмкін.

Көкжөтелдің алдын алудың ең тиімді әрі сенімді тәсілі – жоспарлы иммундау. Қазақстан Республикасының ұлттық егу күнтізбесіне сәйкес, көкжөтелге қарсы вакцина балаларға өмірінің алғашқы жылында бірнеше рет егіледі және кейін қайта егу жүргізіледі. Бұл вакцина дифтерия мен сіреспеге қарсы біріктірілген түрде салынады.

Вакцинацияланған балаларда көкжөтел өте сирек кездеседі немесе ауру жеңіл түрде өтеді. Ең бастысы – ауыр асқынулардың алдын алады. Сондықтан ата-аналар балаларын уақытылы еккізу арқылы олардың денсаулығын қорғауға үлкен үлес қосады.

Вакцинациямен қатар, төмендегі алдын алу шараларын сақтау маңызды:

– Жөтеліп жүрген адамдармен тығыз қарым-қатынасты шектеу;

– Қоғамдық орындарда жеке гигиена ережелерін сақтау;

– Үй-жайды жиі желдетіп, тазалықты қамтамасыз ету;

– Балаларда ұзаққа созылған жөтел байқалса, міндетті түрде дәрігерге қаралу.

Көкжөтел – алдын алуға болатын ауру. Уақтылы вакцинация, санитарлық-гигиеналық талаптарды сақтау және халықтың медициналық сауаттылығын арттыру арқылы бұл дерттің таралуын азайтуға болады. Әрбір ата-ана мен қоғам мүшесі жауапкершілік танытса, балалардың өмірі мен денсаулығын сақтауға нақты үлес қоса алады.