КҮМІСПЕН КӨМКЕРІЛГЕН АРУ

Ұлтай қызымыз бүгінде аудандық дене тәрбиесі, спорт және туризм бөлімінің «Спорт клубында» жаттықтырушы болып істейді. Ол жас спортшыларға самбо күресінің қыр-сырын үйретіп, жеңісті жолдарға тәрбиелеуде.

Ұлтай Шакманқызы жайында айтар болсақ, ол 2005 жылы Жосалы кентінде дүниеге келген. Ү.Томанов атындағы №183 орта мектептің түлегі болып табылады. Тараз, Ташкент қалаларында өткізілген жасөспірімдер мен жастар арасындағы самбо күресінен Қазақстан Республикасының жеңімпазы, екі дүркін Азия чемпионатының қола жүлдегері биігіне көтерілген. Самбо күресінен спорт шебері. Татарстанда ұйымдастырылған белбеу күресінен жасөспірімдер арасындағы Әлем біріншілігінің қола жүлдегері. Сондай-ақ Ақтауда өткен әйелдер арасындағы жауынгерлік самбодан Қазақстан Республикасының жеңімпазы атанған.

«Ұстазы жақсының ұстанымы жақсы» демекші, Ұлтайдың бапкері, жоғары санатты ұстаз, олимпиадалық емес спорт түрлерінен жоғарғы спорт шеберлігі мектебінің жаттықтырушысы Бақберген Тәтімбетов ініміз.

– Ұлтайдың алғашқы жаттықтырушысы, білікті маман Гүлайым Нұрмаханова апайы. Ол да менің шәкіртім. Қазіргі таңда балаларды №16 балаларжасөспірімдер мектебінде самбодан жаттықтырады. Ұлтай маған 2017 жылы, 6-сынып оқып жүргенінде келді. Алдымен Гүлайымнан жаттықты. Қазақ, дзюдо, самбо күрестерінен жастар мен жасөспірімдер арасында облыста бірнеше мәрте чемпион болды. Дзюдо күресінен спорт шеберлігіне үміткер. Қарағандыда өткен 23 жасқа дейінгі жастар арасында Қазақстан Республикасы чемпионатының қола жүлдегері саналады.

Палуан қызымыз еңбекқор, бала күнінен спортты жақсы көреді. Жалқаулыққа, өзімбілемділікке жаны қас. Соңғы уақытта жауынгерлік самбо бойынша жарыстарға шығып жүр. Осы жылдың қарашасында Қырғызстанда болатын ересектер және әйелдер арасындағы жауынгерлік самбодан Әлем чемпионатына қызу дайындалып жатырмыз. Оның болашағынан үлкен үміт күтіп отырмыз. Халықаралық спорт шеберлігі нормативін орындайды және бұйырса Әлем чемпионы болады деген үміттеміз, – дейді Бақберген Бақытбекұлы.