Алексей Полторанин Пхёнчхан Олимпиадасында ел намысын қорғайды
Алексей Полторанин үшін биылғы «Тур де Ски» аса жемісті аяқталды.
Жарыстың соңғы кезеңінде шаңғышылар 9 шақырымға еркін әдіспен жүгіру бойынша сынға түскен еді. Жерлесіміз бәсеке басынан үздіктер қатарына қосылып, біраз уақыт екінші болып келе жатты. Бірақ мәреге жақындағанда Норвегия және Канада спортшыларына жол берді. Сөйтіп, жарыс қорытындысы бойынша қазақстандық шаңғышы 4-орынға тұрақтады. Бұдан бөлек Полторанин «Тур де Ски» көпкүндігінде 15 шақырымдық масс-старттың алтыны мен 15 шақырымдық классикалық жүгірістің күмісін жеңіп алған болатын. Соның арқасында ол жалпы есепте 4-сатыға орналасты. Алексей Полторанин енді бірер аптадан кейін басталатын қысқы Олимпиадада ел намысын қорғайды және дәл осы жетістіктерін қайталай алады деп үміттенеді көпшілік.
Алексей Наконечный, А.Полтораниннің жеке бапкері:
– Алексейдің физикалық бабы жақсы. Әдетте, маусым басында сәл ауырып қалатыны бар еді. Биыл бәрі дұрыс. Әлемдік додаларда үздік нәтижелер көрсетіп жүргендігі де сондықтан. Ал енді Олимпиадада қалай боларын кесіп айту қиындау. Шаңғы спортында бәсеке өте жоғары. Әсіресе Кәрі құрлық елдері, оның ішінде Скандинавия елдерінің спортшылары алдына жан салмайды. Алексей елдің одан медаль күтетіндігін жақсы біледі.
