qarmaqshy-tany.kz Италия мемлекетінің Лидо ди Езола қаласында дүниежүзінің 63 мемлекетінен 735 спортшы қатысқан жастар мен жасөспірімдер арасында кикбоксингтен әлем чемпионаты өтті.

Байрақты жарыста біздің де жерлестеріміз қатысып, онда ел намысын қорғаған Байқоңыр қаласының балалар мен жасөспірімдер спорт мектебінің шәкірті 51 келі салмақта Нұрасыл Тілектесов әлем чемпионы атанды.

Ол 6 жасынан бері спорттың осы түрімен айналысып келеді.

«Менің спортқа деген қызығушылығымды алғашқы жаттықтырушым Нұрбек Маратұлы мен қазіргі жаттықтырушым Берік Қараманұлының қажырлы еңбегі деп түсінемін. Осындай талантты ұстаздарымның арқасында үлкен жетістікке қол жеткізіп отырмын. Алдағы уақытта ел намысын қорғауда осы жетістігімді қайталаймын деп уәде беремін» дейді әлем чемпионы Нұрасыл.