Анкарада қазақстандық студенттер арасында шағын футболдан турнир өтті
Түркия астанасы Анкарада қазақстандық студенттердің арасында шағын футболдан турнир өтті. Тартысты бәсекеге Конья, Кайсери, Сакарья мен Бурса қалаларынан 8 команда қатысып, сайыстың көрігін қыздырды. Жасыл алаңға жігерленіп шыққан ойыншылар аянып қалған жоқ. Допқа таласта қызу ойын өрнегін көрсетіп, жанкүйерлердің қошеметіне бөленді. Ұйымдастырушылардың айтуынша, турнирдің алға қойған мақсаты – елден жырақта жүрген қазақ жастары арасында достық, бауырмалдылық пен ауызбіршілікті нығайту. Азамат Асанов, Анкара университетінің студенті: – 2002 жылы 25 сәуірде Қазақстан Стокгольм қаласында УЕФА-ға қабылданған болатын. Соның негізінде Қазақстан футболының күні деп 25 сәуірді атаулы мереке ретінде тойлап келеміз. Түркиядағы Қазақстан елшілігінің тікелей қолдауымен және Анкарадағы қазақ жастарының ұйымдастыруымен Түркияның түкпір-түкпірінен қазақ жастары жиналып, үлкен деңгейде турнир өткіздік.
24.kz
