Хоккейден 2017-2018 жылғы маусымдағы ел чемпионы анықталды. Бұл жолы көкшетаулық «Арланға» тең келер ешкім болмады.

Олар соңғы сында астаналық «Номадпен» өзара мықтыны анықтаған еді. 6 матчқа созылған кездесулер сериясы ақыры Владимир Капуловский баптайтын жігіттердің басымдығымен аяқталды. Көкшетау қаласында өткен шешуші ойында алаң иелері сапындағы Владислав Колесников шайба соғып, өз командасына жеңіс сыйлады. Осылайша «Арлан» өз тарихында алғаш рет ел чемпионы деген атаққа қол жеткізіп отыр. Бұған дейін олар ішкі біріншілікте 3 рет күміс және 2 мәрте қола жүлдегер атанды. Ал команданың өзі 2009 жылы құрылды. Соңғы матч қорытындысы бойынша «Арлан» сапындағы Михаил Демидов ең үздік қақпашы, ал Вадим Бердников ең үздік шабуылшы атанды. Ал «Номад» сапындағы Сергей Егоров пен Иван Верещагин сәйкесінше ең үздік қорғаушы мен ең үздік жас ойыншы деп танылды.