Кеше ғана мәнерлеп сырғанаудан аяқталған Қазақстан чемпионатында Элизабет Тұрсынбаева жеңіп алған Олимпиада жолдамасының бірі кімге берілетіні анықталды. Нәтижесінде 2018 жылы Пхенчханда өтетін қысқы ойындарына Айза Имамбек қатысады, деп хабарлайды Baq.kz тілшісі.

Астанадағы «Алау» мұз сарайында 26-28 желтоқсанда мәнерлеп сырғанаудан Қазақстан чемпионаты өтті. Ел біріншілігіне 11 мен 25 жас аралығындағы әр өңірден келген 80 спортшы қатысты. Сондай-ақ, мәнерлеп сырғанаудан 2018 жылы Пхенчханға баратын үшінші атлет анықталды.

Еске сала кетсек, Хельсинкиде өткен әлем чемпионатында 9-орын алған Элизабет Тұрсынбаева қос Олимпиада жолдамасын жеңіп алды. Екінші лицензияға биылғы біріншіліктің күміс жүлдегері Айза Имамбек ие болды. Ал оның басты қарсыласы Жансая Әдіханова үшінші орыннан көрінді. 14 жастағы Алана Тоқтарова 2017 жылғы Қазақстан чемпионы атанды. Ол жас регламентіне байланысты 2018 жылғы қысқы Олимпиадаға бара алмайды.

Бұған дейін, мәнерлеп сырғанаудан Денис Тен мен Элизабет Тұрсынбаеваның Олимпиадаға қатысатыны белгілі еді. Ал кешегі жарыстан соң үшінші лицензия Айза Имамбектің еншісінде.