Олимпиада 2018: Элизабет Тұрсынбаева жарысты 12-орынмен аяқтады
Мәнерлеп сырғанаудан Элизабет Тұрсынбаева 24 қатысушының арасында үздік 12 спортшының қатарынан көрінді.
Еркін бағдарламасын сәтті орындап, жарыс ортасына дейін көш бастап келген жерлесіміз бұл сынның аралық жеңімпазы атанғанын да айта кеткен жөн. Техникалық жағынан күрделі элементтерді оңай еңсерген жерлесіміз төрешілерден 118,30 ұпай алып, қысқа бағдарламасымен қосқандағы жалпы көрсеткіші 177,12-ні құрады. Бұл бәсекеде Ресей елінен барған мәнерлеп сырғанаушы Алина Загитова қос сайыс нәтижесі бойынша 239,57 ұпай жинап, алтын тақты.
Элизабет Тұрсынбаева, мәнерлеп сырғанаудан Қазақстан құрамасының мүшесі:
- Мұз айдынында толқынысымды жеңе алғаным үшін қуаныштымын. Бағдарламамды аяғына дейін ойдағыдай орындап шықтым. Сондықтан қазірдің өзінде жақсы нәтиже көрсеттім деп айта аламын. Өйткені жаттығуда болған бабым бүгінгіден төмен еді. Енді дәрігерлердің кеңесі бойынша жарақатымнан толық айығу үшін сәл үзіліс ала тұруға тура келеді.
