Мақсаты биік "Қайсар"

– Сыр спортында "Қайсардың" орны ерекше. 2016 жылдан бері команданың аяқ алысы жаман емес. 2017 жылы Премьер-лигада 6-орында болсақ, былтыр 5-орынға көтерілдік. Ал биыл 3-орынға шығамыз немесе Кубокты аламыз деп жоспарладық. Нәтиже жаман емес. Маңдай термен жеңіске жеттік. Енді неге Еуропаның шыңына шықпасқа?! Менің қуанғаным – тарихи голды жер­лесіміз Думан Нәрзілдаевтың салғаны, – деді О.Акимов.

Биыл Сыр футболы үшін барлық мәселе түбегейлі шешілді. Соның бірі – Ғ.Мұратбаев атындағы орталық стадион. Күрделі жөндеуден өткен атындағы орталық стадион еуропалық стандартқа сай. Басқарма басшысы еуропалық қарсыластарды стадион қабылдауға дайын екенін айтты. Сонымен қатар  биыл «Қайсар» командасында жергілікті ойыншылардың қатары көптеп толықты. Бұл «Байқоңыр» командасының қарқынды жұмысы деп бағалауға болады. Финалда жеңіс сыйлаған Думан Нәрзілдаев та сол команданың түлегі.

– Әлі күнге дейін сол толқыған, қобалжыған күйімнен шыға алмай жүрмін. Ерекше сәт болды. Бұл – менің кіндік қаным тамып, бұғанамды қатайтып, қанат бітірген туған жерімнің, қолдау көрсетуден аянып қалмайтын туған елімнің жеңісі. Жеңіс құтты болсын, жерлестер! – деді тарихи голдың авторы.

Жаңа маусымның жаңалығы бас бапкер Стойчо Младенов өз қызметін жалғастырады. Ал алдағы жылдың қаңтар, ақпан айларынан бастап Еуропа лигасына күшейтілген режимде дайындықты бастайды. Қазіргі құрамның 80 пайызы келер маусымда да өнер көрсетеді деп күтілуде..

– Бұл – Сыр елінің жеңісі. Ойыншылар да, жанкүйерлер де бар күш-жігерімізді жұмсадық. Сондықтан жеңіс құтты болсын, жерлестер! Алдағы уақытта да «Қайсардың» жұлдызы жарқырай түсетініне сенімім кәміл, – деді команданың директоры Серік Құттыбайұлы.

Еуропа лигасына жолдама алған "Қайсардың" алға қойған мақсаты биік. Келер жылы команда үздіктер қатарынан көрінуді көздейді. Әлемдік аренада ел намысын қорғайтын қасқырларға сәттілік тілейміз!