Таңертең балалар балабақшаға барар алдында үйдің шатырына қатқан сүңгіні көріп «Анашым, ұзын-ұзын мұздарды қарашы. Алып берші» деп қолқалап қоймайды. Газ мөржесінен де қатқан мұздар бар екен, соны алып беріп едім. Бірден ауыздарына салып, дәмін көріп жатыр.

Қалың қардың түсуі нәтижесінде үйдің, ғимараттардың шатырынан мұз сүңгілер пайда болады. Шатырдағы мұздар адамдарға қауіп төндіреді, өйткені кез келген уақытта құлап кетуі мүмкін. Егер ол адам басына түссе, салдары ауыр болады. Сүңгі мұз тек адамдарға емес, ғимараттардың маңында тұрған көліктерге де қауіпті.

Жыл сайын жоғарыдан құлаған мұздан бірнеше адам зардап шегеді. Тіпті адам шығын болып жатқанын да көріп жүрміз. Бір қарағанда мұз шатырға нық жабысып тұрған сияқты көрінеді. Бірақ кез келген жағдай, тіпті әлсіз желдің өзі оның жоғарыдан құлап кетуіне себеп болуы мүмкін. Мұздың құлауынан абай болу керек, ғимараттардың қабырғаларына, балкондардың астына жақындамауға тырысқан жөн. Шатырдағы мұз бен қар қабаттары құлап кетуі мүмкін жерлерден аулақ болған абзал.

Көктайғақтың кесірі де айналып өпейді. Сондай-ақ көше бойындағы тайғақ жерлерден де байқап жүргеніңіз дұрыс. Жаяу жүргінші де, көлік тізгіндеуші де сақтық шараларын ескеру керек. 112 желісінен келген ескертпелер мен хабарламаларға да құлақ асқан абзал.