ҚОҒАМ ДАМУЫНА ОҢ СЕРПІН
Тірлік кешіп отырған қоғамдағы ана мен баланың риясыз күлкісі, шынайы шат бейнесі әрине, береке мен бірліктің арқасы. Көне көздеріміз айтқандай, анасы мұңаймаған, баласы жыламаған елдің бағы бес елі. Бүгінде мемлекетте көпбалалы аналарға көптеген қолдау көрсетілуде. Әлеуметтік атаулы көмектен бөлек, мекеме, кәсіпорындағы кәсіподақ ұйымдары да белсенділік танытып, ана мен баланы қанатының астына алуда.
Осындай тегін жолдамаға қол жеткізгеннің бірі – «Алтын алқалы» ана Зейнеп Исмағұлова. Ол жақында орта мектепте оқитын қызымен бірге Түркістан облысының Түлкібас ауданына қарасты Кемербастау елді мекенінде орналасқан «Таң нұры» шипажайында он күн тегін демалып қайтты.
– Жасым елуге таяса да бұған дейін шипажайда болған емеспін. «Балаларды жетілдіремін» деп жүріп, өзіме қарауға уақыт болмапты. Үйде бала тәрбиесімен айналыстым. Қайырымды жандардың көмегімен былтыр жұмысқа тұрдым. Қазір Жосалы кенті орталығындағы орта мектептің бірінде жұмыс істеймін. Жақсы адамдар жанымнан табылуда. «Таң нұрында» өзім секілді облыстың 23 «Алтын алқа» иегері баласымен келіп, тынықты. Оның ішінде өңірден екі ана: бірі – өзім болсам, бірі – Т.Көмекбаев ауылының тұрғыны Роза Орнықбаева. Онда бірқатар іс-шараға қатыстық. Таудың таза ауасын жұтып, жидек тердік. Суға шомылып, жергілікті жердің тарихымен таныстық. Киелі орындарға ат басын тіреп, тәу еттік. Перзенттерімнің арқасында Қазақстанның кең байтақ жері мен табиғатын тамашаладық. Көпбалалы аналар бас қосқан шипажайдағы күндеріміз көңілді өтті. Отбасының күйкі тірлігінен ұзап, демалуға мүмкіндік жасаған облыстық білім және ғылым қызметкерлері кәсіподағы комитетіне алғысымыз шексіз, – дейді жеті балалы ана.
Аудандық білім қызметкерлері кәсіподағы комитетінің төрайымы Жұлдызай Кетебайқызының айтуынша, бізде мұндай шараның басталғанына биыл үшінші жыл. Батыр аналардың денсаулығын сауықтыруға байланысты тегін жолдама берілсе, балалар лагерь есебінен тынығуда.
– Былтыр «Күміс алқалы» аналарды тынығуға жіберсек, осы жазда «Алтын алқалы» үш ана кәсіподақ комитеті арқылы шипажайға жолданды. Ана мен балаға көрсетілетін қолдау алдағы кезеңде де жалғасатын болады. Себебі бұл Қазақстан Республикасының Президенті Қасым-Жомарт Тоқаевтың сайлауалды бағдарламасында атап көрсетілген басым бағыттың бірі, – дейді Ж.Молдабаева.
Дүниеге ұрпақ әкеліп, оны бағып-қағу ана үшін аз мехнат емес. Содан болар қазақ атамыздың: «Анаңды үш рет Меккеге арқалап апарсаң да мойныңдағы парызыңды өтей алмайсың» дейтіні. Ана – ұлттың тәрбиешісі. Сол себептен де анаға жасалған жағдай, ұлтқа көрсетілген құрмет.
Сәрсенкүл АҚКІСІ
