СТУДЕНТТЕР ТӘЖІРИБЕ АЛМАСТЫ
АУДАНДЫҚ АГРАРЛЫ-ТЕХНИКАЛЫҚ КОЛЛЕДЖІНДЕ «ҰЛЫ ДАЛАНЫҢ ЖЕТІ ҚЫРЫ: ТАРИХ ПЕН ТАҒЫЛЫМ» АЙМАҚТЫҚ ҒЫЛЫМИ-ТӘЖІРИБЕЛІК КОНФЕРЕНЦИЯ ӨТТІ. КОНФЕРЕНЦИЯҒА КӨРШІЛЕС ҚАЗАЛЫ, ЖАЛАҒАШ АУДАНДАРЫ, БАЙҚОҢЫР ҚАЛАСЫ МЕН АУДАНДЫҚ КОЛЛЕДЖДЕН 10 СТУДЕНТ ҚАТЫСТЫ.
Елбасы Н.Назарбаевтың «Ұлы даланың жеті қыры» мақаласына негізделген шарада студенттер түрлі тақырыпта баяндама қорғады. Оның ішінен ерекше ізденіспен көзге түскен Жазира Нағашыбайдың «Туған жердің тарихын дәріптеген – Толғанбек» тақырыбындағы баяндамасы үздік деп танылды.
Конференция қорытындысы бойынша Қазалы аграрлы-техникалық колледжінің студенті Жазира Нағашыбай ІІ орынды иеленді. Ал ІІІ орынды Жалағаш индустриалды-аграрлы колледжінің студенті Оразәлі Ақылбекұлы мен Қармақшы аудандық аграрлы-техникалық колледжінің студенті Абылай Баймұрзаевтар еншіледі. Барлық қатысушыларға арнайы сертификаттар табысталды.
Шара барысында студенттер өзара тәжірибе алмасты. Конференцияда сын-пікірлер де айтылды. Сала мамандары баяндаманың жазылу ережесі талапқа сәйкес келмейтіндігі, ізденістің аздығы туралы ескертті.
Ұйымдастырушылар бұл шараның алдағы уақытта жалғасы болатынын, айтылған сын-пікірден нәтиже шығаратындарына сөз берді.
Ақнұр САҒЫНТАЙ,
«Қармақшы таңы».
