ЖАС ҒАЛЫМДАР ЖЕТІСТІГІ

ҚАЗІР БІЛІМДІНІҢ ЗАМАНЫ. ОҚЫҒАН ОЗАДЫ, ТАЛПЫНҒАН ТАБАДЫ. СОЛ СЕКІЛДІ ОҚУШЫЛАР ҮЙІНІҢ «ЗЕРДЕ» ҮЙІРМЕСІНІҢ МҮШЕЛЕРІ ДЕ КӨПТЕГЕН ҒЫЛЫМИ ЖОБА ҚОРҒАП, ПӘНДІК ОЛИМПИАДАДА БАҚ СЫНАУДА. ОНДАҒЫ МАҚСАТ – БІЛІМ БИІГІН БАҒЫНДЫРУ.

Аталған үйірменің оқу­шылары сабақтан тыс уақытта білімін шың­дауға дағдыланған. Жас ғалым­дардың жетістігі де жетерлік. Атап айтқанда, №27 мектептің 3-сынып оқушысы Ж.Жексенбайұлы ха­лық­аралық пәндік олимпиада­да бас жүлдеге ие болса, «Жас ғалым – 2019» атты ғылыми жоба байқауында үздіктер қатарын түйін­деген. Осы білім ошағының 3-сынып оқушысы Р.Мұқамбетқалиқызы аудандық ән байқауында жүлделі орыннан көрінсе, республикалық, халықаралық ән сайысында бәсі биік шығып жүрген өнерпаз. Ол «Нұрлы жастар» тақырыбындағы рес­публикалық жасөспірімдердің өнер додасында «Эстрадалық вокал» жанры бойынша лауреат атанса, №250 мектеп-лицейдің 2-сынып оқушысы Д.Қошалақова үйірмеге үзбей қатысатын талапты шәкірттің бірі. Ол да «Жас ғалым-2019» ғылыми жоба байқауының ІІ орнын қанжығасына байласа, «Нұрлы жас­тар» республикалық байқауында «Шығарма» номинациясы бойынша І орын дипломанты. Үйретері көп үйірмеде алғырлар аз емес. Соңғы кезде көзге жақсы түсіп жүрген Абай Қалдыбек те айтулы байқаудың І орнын жеңіп алса, Бейбарыс Мұқамбетқалидың жобалары республикалық ғылыми жинаққа енді.

– Балалар оқу-білімге құштар. «Зерде» жас зерттеуші үйірмесінің зерек те зейінді оқушылары әлі талай шыңды бағындырады, – дейді үйірме жетекшісі А.Өткелбаева.

Иә, «Үздік ұстаз» төсбелгісінің иегері А.Ордабекқызы өзі баулып жүрген жас шәкірттерін әркез мақтан етеді. Жас ғалымдардың жетістігінде оқушылар үйінің директоры И.Әбдібекованың, сон­дай-ақ оқу-ісі жөніндегі орынбасар Қ.Манасова мен оқу әдіскері А.Әбдірееваның да өзіндік үлесі бар.