АҢСАҒАННЫҢ «АҢСАҒАН» КӘСІБІ
Қыс. Үскірік аяздан ептеп демалу мүмкін емес. Қатты «қысым сумен» жеңіл көлік жуған нәзік жандының ойын әлдекімнің дауысы бөліп жіберді. Бұл аз уақытта тиімді қызмет көрсеткен бойжеткеннің жұмысына алғысын білдіріп жатқан жұртшылық еді. Еңбегі еленгенде сақыр-сұқыр сырқыраған саусағы, аяздан тоңған аяғы да әп сәтте ұмытылатын. Иә, тұтынушының айтқан «рахметі» оны тек алға жетеледі.
Қысы-жазы үздіксіз көлік, кілем жуып, нәпақа тауып жүрген бойжеткен – Аңсаған Оразбекқызы. Жас кәсіпкер мектеп қабырғасынан соң аграрлы-техникалық колледжде білім алады. ЭЕМ операторы мамандығын алған соң спорт қуып Нұр-Сұлтандағы білім ошағының біріне оқуға түседі. Мұндағы екі жылдық білімінен соң ауылға қайта оралады.
– Туған жерге келгенде ең бірінші ойымда «тіршілік ету керек» деген сөз жаңғырып тұрды. «Жасыңда еңбек етсең, қартайғанда соның жемісін көресің» дейді ғой. Барлығы да оңай бастала қоймады. Жобаға қатысып, несие алмадым. Қолдағы бар қаражатпен алғаш осы кәсіпті қолға алдым. «Мойка» – «Достық» автостансасының жанында орналасқан. Осы жерді жалға алып, көлік, кілем жуып келе жатқаныма да бір жылға жуықтапты. Енді ғана тәй-тәй басқан кәсіпке осы жердің иесі Бақтияр Ешмұратов демеу болды, – дейді ол.
Қыз – қашан да нәзік жаратылған. Елестетіп көріңізші, сол нәзікжандының қысымы қатты, ауыр аппаратты ұстап жеңіл көлік жуғанын. Бұл қаншалықты ауыр? Әрине, ең бастысы болашақ ананың денсаулығына керағар.
– Қыстыгүні салқын сумен де жуатын кездер болады. Суды пешке жылытып барып жумасаң, салқыннан сай-сүйегің сырқырайды. Бұл ауыр жұмысқа да үйреніседі екенсің. Көліктер қондырғымен жуылса, кілемді қолмен жуамыз, – дейді Аңсаған. Жас кәсіпкер бізбен әңгімесінде қандай қиын күндерді басынан өткергенін де бүгіп қалмады. Әңгімеге тез-ақ ене кететін бойжеткеннің алға қойған мақсаты көп.
– Қиын сәттер... Әрине, онсыз болмайды ғой. Отбасымды асырау, қатарымнан қалмау үшін еңбектеніп келемін. Алда тұрған бөгет қаншалықты көп болса, алға қойған ұмтылысым да соншалықты мықты болды. Мойымадым. Қазір бірте-бірте аяққа тұрып келеміз. Сол армандарымның арқасында ешбір қиыншылық білінбеді, – дейді Аңсаған Камалова күлімсірей.
Қолы жұмыстан қалт етсе мұқтаж отбасыға көмек көрсету – арудың дәстүрлі үрдісіне айналған. Әлеуметтік осал топтағы жандардың, көпбалалы ананың кілемдерін тегін жуып береді. Сәті түссе азықтай көмек көрсетеді. Кәсібінен береке тауып жүрген бойжеткеннің мұнымен шектеліп қалғысы жоқ. Алдымен жұмысқа керек құрал-жабдығын түгендеп алса, содан соң өзінің жеке көлік жуу орталығын ашар үміті бар.
Айнұр ӘЛИ,
«Қармақшы таңы».
