«Таза қол, дене белсенділігі»

Қармақшы аудандық қоғамдық денсаулық сақтау басқармасы Жосалы кентінде орналасқан №20 «Толғанай» балабақшасының тәрбиеленушілері арасында «Таза қол, дене белсенділігі» тақырыптарында акциялар өткізді. 

Акцияның мақсаты қатысушылардың тазалық туралы ойларын кеңейту. Өз-өзіне қызмет көрсете алу және салауатты өмір салтын ұстануға, тазалыққа, ұқыптылыққа үйрету. Денсаулықтарын, тазалықты сақтауға тәрбиелеу. 

Сонымен қатар, аталған балабақша қызметкерлері арасында «Өз денсаулығын өз қолыңда», «Болашаққа қадам» тақырыптарында акция өткізіліп, түсіндіру жұмыстары жүргізілді. 

Ұйымдастырылған акцияның негізгі мақсаты – аурудың бастапқы кезеңін және тәуекел факторларын айқындау үшін жас ерекшеліктеріне сәйкес скринингтен өту қажеттілігін, профилактикалық медициналық тексерілуден уақытылы өтудің маңыздылығын халықтың назарына жеткізу. Ол уақытылы ем қабылдауды, сауығып кетуді қамтамасыз етуге, сондай-ақ асқынуға, мүгедектікке және өлімге әкеліп соқтыратын аурудың күрделі түрінің дамуын тоқтатуға мүмкіндік береді. Сонымен қатар, ағзаны сауықтыру, жүгіру, жаяу жүру денсаулықты нығайтудағы ең қарапайым тәсілдер екендігін халыққа түсіндіру, халықты физикалық белсенділікке тарту.