Жеңіс мерекесі тойланды

Ұлы Жеңіс күні "Тағзым" алаңына гүл шоғын қойып, майдан даласында құрбан болған боздақтардың рухына арнап Құран бағыштаудан басталды. Шараға аудан әкімі Сұлтан Мақашов бастаған әскерилер, ардагерлер мен қала жұртшылығы "Мәңгілік алау" алдында тағзым етті. Бір минут үнсіздік. Ой сан-сақта. Батырлықтың, ерліктің әсем бейнесі көз алдымыздан құдды кино кадрындай өтіп жатыр, өтіп жатыр...

Орталық алаң. Жеңіс күні тойланып жатса да көңілде бір мұң бар секілді. Неге? Айтып келмеген соғыс талай жас­ты қыршыннан қиды емес пе? Біз ше? Біз сол батырлар жау қолынан жұлып әперген бейбіт өмірде іздерін жалғап келеміз.

– Жеңіс жолында құрбан болып, сол зұлмат күндерге жастық шағы қатар келген аға буынның барлығы да ұлықтауға лайық. Ортақ Отанды қорғау үшін ауданымыздан бес мыңға жуық азамат аттанып, жартысынан көбі туған жерге оралмаған. Жыл өткен сайын олардың қатары да азайды. Бүгінде тек Ұлы Отан соғысының тірі куәгері Қуанышбай Бисенбаев ағамыз ғана арамызда. Біз Жеңіс сарбаздарын әлі де жауынгерлік сапта деп есептейміз. Себебі, ардагерлер өнегелі ісімен, ұлағатты ақыл-кеңесімен ауданның өсіп-өркендеуіне үлес қосып келеді. Сол үшін, қашан да Жеңіс жауынгерлерін ардақ тұтамыз, ұмытпаймыз. Мәңгілік есімізде сақтаймыз, – деді аудан басшысы Сұлтан Ысқақұлы.

Салтанатты шарада патриоттық әндер шырқалып, қойы­лымдар көрсетілді. Аудан өнерпаздарының арнайы дайындаған концерттік бағдарламасы жиналған жұртшылыққа көтеріңкі көңіл-күй сыйлады.

Жеңіс үшін аштыққа да, ауыр жұмысқа да жегілген, кеудесін оққа тосып, өлімге қарсы тұрған майдангерлер ешқашан ұмытылмақ емес. Олар бүгінгі көк аспанында ақ көгершіні қалықтаған бейбіт күнді сыйлады. Сол үшін олар қашан да құрметке лайық жандар.