Шамшат жырау
Атадан балаға мирас болған ақындық, жыраулық өнердің ұлылығын сақтап, ұлы өлкеміздегі жырау қыздар көшін бастаған айрықша талант иесі, көмейіне бұлбұл ұя салған жыршы-термеші Шәмшат Төлепова. Шәмшат апамыздың артында өшпес өнері, сарқылмас бай мұрасы, өнерін ардақтаған ел – халқы, ізін жалғаған шәкірттері бар. К.Рүстембеков атындағы Жыраулар үйінің ұйымдастырумен Ш.Төлепова атындағы Мәдениет үйінде өткізілген «Домбырасын моншақтаған жыр жауһарлары» атты облыстық қыз-келіншектердің жыр фестивалінің қатынасушыларының және көрермендердің назарына қалалық кітапхананың қызметкерлері «Сыр бойында Шамшат бар домбырасын моншақтар» атты кітап көрмесін ұсынды. Онда жырау жайлы жазылған мақалалар мен газет қиындылары, кітаптар қойылды. Шәмшат Төлепова белгілі жырау ғана емес, қаншама шәкірттерді өнер жолына баулыған ұлағатты ұстаз, ұл мен қыз өсірген ардақты ана. Ол кісі туралы әлі талай дастан жазылар, әлі талай тарих ақтарылар. Жыр әлемінде Шамшат жыраудың ізбасараларының көбейіп келе жатқанына қуандық.
