АЛҒЫСЫН БІЛДІРДІ
«Істің ең қайырлысы – қайырымдылық» деп бекер айтылмаса керек. Жан-жағыңа шуақ шашып, титімдей болса да өзгеге үміт ұшқынын сыйласаңыз нұр үстіне нұр болар еді. Иә, қарбаласқан күйбең тіршіліктен айналамызға бір сәтке зер салмайтынымыз жасырын емес.
Аудан орталығында Ардагерлер аллеясы орналасқан. Демалыс орны жанға, жайлы көңілге қонымды орын. Алайда, аллеяға тек демалыс үшін келемейтіндер де бар. Бұл маңдағы газеттің алдыңғы санында жазылған «вандализмі» орын алады. Қоқысты шашады, орынтақты сындырады. Бірақ азанда осы жерден өтсең айналасы да, іші де мұнтаздай таза. Кім, қашан істеп үлгереді, қызық қой иә? Байқасаңыз жасы үлкен апа-ағаларымыз таң атқаннан кеш батқанға дейін көше тазалап жүреді. Бұл бір еріккендік емес қой. Нан керек. Шалқадан түсіп, мемлекетке сары ауыз балапандай аузын ашып жатқандарын да көріп жүрміз. Оның қасында бұл – адал еңбек. Ал осы еңбектің адамдары әрқашан құрметке лайық. Бұл кісілерге де зер салып көрелік. Басқа қолдан келмесе, ең болмағанда қолымыздағы бос бөтелкені неге апарып қоқысқа тастамасқа? Ол да сіздің анаңыз секілді адам, ол да сіздің әкеңіз секілді жан. Қош. Әлгінде айтқан үміт отын сыйлаушылар да табылды. Яки аудандық жастар ресурстық орталығының жастары мен аудандық жастар мәслихатының депутаттары көркейту, көгалдандыру және тазалық жұмысына еңбегі сіңіп жүрген бірқатар жандарға алғыс білдірді. Көңіл-күйін көтеру үшін рақметін айтты, ойнады, күлді. Аз күнге болса да жететін азығын, тәтті-пәттісін сыйлады. Иә, олардың көз жанарындағы жалынды көрсеңіз ғой. Орындықта ойланып ұза-а-ақ отырды да «жұмысымызды істейік» деп жан-жаққа тарқасты. Әрине, жастардың бұлай көңіл бөлгеніне алғысын білдірді.
Айнұр ӘЛИ,
«Қармақшы таңы».
