ҰСТАЗ МӘРТЕБЕСІ АРТПАҚ

Бұл – ұстаз мәртебесін көтеру үшін зор мүмкіндік. Мұғалімнің мәртебесін көтеру туралы Елбасының айтқан сөзі бәріміздің көңілімізден шығып, үлкен қуанышқа бөледі. Өйткені мұғалімдердің мәртебесін көтеру – елдің мәртебесін көтеру. Болашақ ұстаз да, дәрігер де, инженер де, біздің еліміздің болашағын жасайтын кадрлардың бәрі мұғалімнің, ұстаздың алдынан шығады. Қазақ бір әріп үйреткенге қырық жыл сәлем беріп, ұлағатты жандардың алдын кесіп өтпеген. Көшеде мұғалім кетіп бара жатса, қаншалықты үскірік аяз болса да, бас киімін шешіп, иіліп құрмет көрсеткен. Осылай болуы да тиіс.
Елбасының кезекті Жолдауында жастар мәселесіне тереңірек мән беріліп, келесі жылды Жастар жылы деп жариялауды ұсынған. «Жастар мен отбасы инс­титутын кешенді қолдау мемлекеттік саясаттың басымдығына айналуға тиіс. Жастардың барлық санатын қолдауға арналған шараларды толық қамтитын әлеуметтік сатының ауқымды платформасын қалыптастыру керек», – деген Президент сөзі талай жастың көңіліне үміт отын сыйлап, кеуделерінде алау жақты.
Сонымен қатар, Жолдауда айтылған білім беру, денсаулық сақтау, шағын және орта бизнесті дамыту, қолжетімді баспана, құқық қорғау органдарының жұмысын жетілдіру, сыбайлас жемқорлықпен күресті күшейту, мемлекеттік қызметтің тиімділігін арттыру сияқты халықтың күнделікті өміріндегі салаларға ерекше мән беруі ешбір әсірелеусіз қазақстандықтардың тұрмыс сапасын жаңа деңгейге көтеретін игі қадам. Сол себепті де, бұл басымдықтарды халық бір ауыздан қолдап, олардың нәтижелі жүзеге асырылуына белсенді қатысатынына кәміл сенеміз.