Сұлулыққа кім де болса іңкәр. Осы іңкәрлік – талай сұлудың түбіне жетіп жүрген сыңайлы. Кей әлеуметтік мәліметке сүйенсек, қоғамда тұрмыс түзелген сайын адам бет, дене сымбатына көбірек мән бере бастайды. Бірінші, бет терісін жасартуға көңіл бөлсе, екінші, үшінші кезекте, артық майдан арылу мен кеуде безін үлкейтуді көздейді. Әйтсе де «сұлулық үшін – жан пида» деп, қалтаңды қаққан ештеңе емес, оның кейде өмір мен өлім арасындағы өлшеуіш екенін де естен шығаратындаймыз. Әлемдік соңғы зерттеулерге қарағанда, дүние жүзінде жасалатын отаның 25 пайызы асқынуға ұшырайды-мыс. Бұл – жаман көрсеткіш. Яғни, отаға жатқызылған әрбір бес мыңыншы адам бақилық болады деген сөз. Мұның басында дәрігердің біліксіздігі мен қателегі тұрары рас. Ота жасатушының жан рахатынан татқаннан гөрі тартатын азабының шаш етектен екенін хирургтер де ашық айтып жүр өмірде. Әлемге әйгілі өнер жұлдызы – Майкл Джексонның тағдыры немен аяқталып еді? Ондаған отаға түскен Элизабет Тейлор ше? Атақты Эльвис Преслидің әйелі Прицелла Преслиді де пластикалық отаның құрбанына айналды емес пе? Жасанды сұлулық – опа әпермеген. Оның өмірі ұзақ болмаған. Оны қасиетті дініміз де құптамайды.