Аудан орталығында алғаш рет мүмкіндігі шектеулі балаларға арналған «Дәметкен» мейірімді мәдени-сауықтыру орталығы ашылмақ. «Болашаққа бағдар: рухани жаңғыру» бағдарламалық мақаласы жарияланғалы еліміз рухани қайта жаңғыруда, жаңаруда, оңды өзгерістерге жол ашылуда. Соның бір қыры – «Туған жерге тағзым» бағдарламасы. Киелі мекеннен жырақта жүріп, өзге өңірде қызмет жасап жүрген бірқатар тұғырлы тұлғаларымыз туған жерге маңдай тіреп, мәдени-рухани, әлеуметтік өсуіне септігін тигізуде
Орталықтың ашылуын қолға алған «Қармақшы ауданының құрметті азаматы» Зарқұм Сартайұлы Бекжанов 1938 жылы Қармақшы ауданына қарасты Диірментөбе стансасында өмірге келген. Ол – Қазақ көлік және коммуникациялар академиясының профессоры. Зайыбы Дина Базаралықызы Исмайлова 1951 жылы Семей облысы, Үржар ауданында дүниеге келген. Қазақ Ұлттық медициналық университетінің бала аурулары кафедрасының доценті, медицина ғылымдарының кандидаты, ҚР «Алтын дәрігер» белгісінің иегері.
Инклюзия – мүмкіндігі шектеулі балалардың өз күшіне деген сенімін арттыру арқылы басқа балалармен қарым-қатынас жасауы.Мейірімді орталықтың басты нысаны да осы. Мұнда балаларға арналған емдік дене шынықтыру, арт-терапия, еңбекке баулу, сурет салу, компьютерге үйрету үйірмелері, сондай-ақ логопед-дефектолог пен психолог кабинетін ашу жоспарда бар. Тұғырлы тұлғаларымыздың өз қаражатынан салынғалы отырған «Дәметкен» мейірімді-сауықтыру балалар орталығы тұрғындарға тегін медициналық көмек көрсетеді.
Игі іс 5-тамыз күні «Жастар саябағында» басталмақ. Сенбілікке кент тұрғындары қажетті құрал-саймандарымен келіп ат салысса нұр үстіне нұр болар еді. Ынтымақ пен бірлік болса – өңіріміз де көркейіп, гүлденбек.