«ҚАУІПСІЗ ЖОЛ» ПРОФИЛАКТИКАЛЫҚ ІС-ШАРАСЫ ӨТТІ
«Заң мен тәртіп» қағидатын ілгерілету мақсатында аудан аумағында «Қауіпсіз жол» профилактикалық іс-шарасы өткізілді. Оның аясында аудан әкімдігі, аудандық полиция бөлімі, ҚР Төтенше жағдайлар министрлігінің трассалық медициналық-құтқару пункті және жедел медициналық көмек қызметінің мамандары бірлесіп, рейдтер ұйымдастырды.
Рейдте жүргізушілер мен жаяу жүргіншілерге жол қозғалысы ережелерін қатаң сақтау, жол-көлік оқиғаларының алдын алу, көлік құралдарын қауіпсіз басқару және жол қозғалысына қатысушылардың өмірі мен денсаулығын қорғау бағытында түсіндірмелер жүргізілді.
Сонымен қатар ҚР Төтенше жағдайлар министрлігінің трассалық медициналық-құтқару пункті мен жедел медициналық көмек қызметінің мамандары жүргізушілерге жолға шығар алдындағы денсаулық жағдайына мән беру, ұзақ сапар кезінде демалыс режимін сақтау, аптап ыстықтың адам ағзасына әсері, алғашқы медициналық көмек көрсету және төтенше жағдайлар кезінде дұрыс әрекет ету тәртібі жөнінде кеңестер берді. Одан бөлек, жол бойындағы қоғамдық тамақтану орындарында кәсіпкерлер мен тұрғындарға қауіпсіздік талаптарын сақтауда ақпараттық-түсіндіру жұмыстары жасалды.
