Египеттегі ел абыройы
Осы аптада Египеттің Исмаилия қаласында өткен ауыр атлетикадан жасөспірімдер арасындағы әлем чемпионатында жерлесіміз Ерасыл Сәулебек ел мерейін үстем етті. Байрақты бәсекеде 88 келі салмақ дәрежесінде сынға түскен жас спортшымыз жоғары шеберлігі мен қайсар мінезінің арқасында әлемдік додада топ жарып, жанкүйерлердің ыстық ықыласына бөленді.
Ерасыл серпе көтеруде 199 келіні еңсеріп, қарсыластарына еш мүмкіндік қалдырмады. Ал қос сайыс қорытындысы бойынша 356 келіні бағындырып, әлем чемпионатының жеңімпазы атанды. Осы нәтижесінің арқасында ол 1 алтын және 1 күміс медаль иеленіп, Қазақстанның абыройын асқақтатты.
Жас спортшының бұл табысы – еліміздегі ауыр атлетика мектебінің қарқынды дамып келе жатқанын көрсетеді. Ерасылдың жеңісі жас буынға үлкен серпін берсе, оның табандылығы мен еңбекқорлығы көпшілікке үлгі болып отыр.
Соңғы жылдары қазақстандық жас ауыр атлеттер халықаралық жарыстарда жоғары нәтиже көрсетіп келеді. Солардың қатарында Ерасыл Сәулебектің есімі де ерекше аталып жүр. Оның Әлем чемпионатындағы тарихи жеңісі – тек спортшының ғана емес, оны баптаған жаттықтырушысы мен қолдау көрсеткен жанкүйерлердің де ортақ қуанышы.
Ерсін ӘБЛӘКИЕВ
