МӘДЕНИ МҰРАЛАР БАҚЫЛАУҒА АЛЫНДЫ
ҚР Парламенті Сенатының депутаты Ғалиасқар Сарыбаев жұмыс сапарымен ауданымызда болды. Ол өңірдің тарихимәдени нысандарын аралап, бірқатар маңызды кездесулер өткізді. Сапар барысында алдымен аудан аумағындағы киелі орындар – Марал баба мен Қорқыт ата мемориалдық кешеніне барып, тағзым етті.
XVII ғасырда бой көтерген Марал баба кесенесі тарихимәдени мұралар тізіміне енгізілген. Көктемгі жауын-шашын салдарынан кесененің қабырғалары сөгіліп, іргетасы ызаланған еді. Соған сәйкес нысанды қалпына келтіруге жоба-сметалық құжаттары әзірленіп, алдағы уақытта ауқымды жөндеу жұмыстарын жүргізу, сондай-ақ Қорқыт ата кешеніне келуші туристер санын арттыру мәселелері қарастырылды.
Мұнан соң Ғалиасқар Төлендіұлының қатысуымен жас мемлекеттік қызметшілермен ашық форматта кездесу өтті. Кездесу барысында жастар көкейлеріндегі өзекті сауалдарын қойып, ұсыныс-пікірлерін еркін білдіру мүмкіндігіне ие болды. Жиында елге адал қызмет ету қағидаттары, мемлекеттік қызмет саласындағы заңнамалар, оның ішінде әдеп нормалары мен талаптары, сондай-ақ сыбайлас жемқорлыққа қарсы шектеулер туралы кеңінен айтылды. Депутат мемлекеттік қызметтің маңыздылығына тоқталып, жас мамандарды кәсіби дамуға, жауапкершілік пен адалдыққа негізделген қызмет етуге шақырды.
«ҚТ» ақпарат
