СЕНАТОРЛАР ҚОРҚЫТ КЕШЕНІНЕ ТӘУ ЕТТІ
Жексенбіде ҚР Парламенті Сенатының депутаты, әлеуметтік-мәдени даму және ғылым комитетінің көшпелі мәжілісінің комитет төрайымы Бірғаным Әйтімова, сенаторлар Мұрат Бақтиярұлы, Серік Бектұрғанов, Сергей Ершов, Бақытжан Жұмағұлов, Динар Нөкетаева, Нариман Төреғалиев күллі түркі әлемінің абызы Қорқыт ата атындағы мемориалдық кешенінде болып, баба басына зиярат етті.
Сапар барысында аудан әкімі Сұлтан Мақашов, облыстық мәслихат хатшысы Наурызбай Байқадамов халық қалаулыларымен бірге болды.
– Сыр өңірі мемлекеттік-жекеменшік әріптестік бойынша еліміздің өзге аймақтарына өнеге. Сапарымыз мемлекеттік-жекеменшік әріптестікке байланысты мәселеге арналып отыр. Мақсатымыз – мемлекеттік әріптестік аясында Қызылорда облысындағы мектепке дейінгі білім беру және денсаулық сақтау ұйымдарының жұмысымен танысу. Облыс орталығындағы бірқатар нысанды аралап, өңірдегі оң тәжірибелердің куәсі болдық. Жоғары баға бердік. Бүгінде аймақ еліміз бойынша бүлдіршіндерді 100 пайыз қамтыған өлке. Бұл – үлкен жетістік. Оны республикаға үлгі ретінде енгізу қажет, – деді комитет төрайымы.
Сыр өңіріне жұмыс сапарымен келген мәртебелі меймандар Байқоңыр қаласындағы емханалар мен балабақшаларды аралады.
Сәрсенкүл ЖАУДАТБЕК,
Қазбек ЖАУЛЫБАЙҰЛЫ (сурет),
«Қармақшы таңы».
