Әлем таныған қала

«Байқоңыр» – адамзат тарихында ғарышқа алғаш қадам басқан жер. Сондықтан оны жердің кіндігі, яғни бастау нүктесі деп атауға толық негіз бар. Ол – тек қазақ даласының емес, бүкіл әлемнің мақтанышы.

Биыл әлемдегі ең алғашқы және ең ірі ғарыш айлағы – «Байқоңырдың» құрылғанына 70 жыл толып отыр. Жақында атаулы жылға және 12 сәуір – Ғарышкерлер күніне орай Ақай ауылдық модельді мультимедиа орталығында кітапханашы Қалимаш Нұрмағамбетованың ұйымдастыруымен «Ғарыш ғаламы» атты кітап дефилесі жасалып оқырмандарға таныстырылды. Оның мақсаты – оқырмандарды кітапқұмарлыққа баулу, кітап оқуды дәріптеп, бос уақытын тиімді өткізуге атсалысу, тұңғыш қазақ ғарышкерлерімен таныстыру, ғарыш әлемі туралы мағлұматтар беру.

Кітап дефилесінде кітаптардан зымыранның макеті жасалып және арнайы «Жер кіндігі – Байқоңыр» атты кітап көрмесі де шараның көркін аша түсті. Шараға қатысқан оқушылар әлем таныған ғажайып қала туралы мол мағлұмат ала білді.

Қымбат БЕРДЕШ.