КӨКТЕМГІ СЕРПІН АЛҒАН СЕНБІЛІК
Көктем мезгілі – жаңару мен жаңғырудың, түрлену мен гүлденудің, сондай-ақ тазалықтың айы. Бұл уақытта қатты жер бусап, көктің шығуына еркіндік береді. Күннің жылы шуағы қардың еруіне сеп болып, Табиғат-ана жанданады. Алайда қыстан кейінгі көрініс те айналаның сәнін бұзатыны тағы бар. Қыс бойы қар астында қалған қоқыстар жер бетіне шығып, сіз бен біз тұрып жатқан ортаның көркін кетіреді.
Елімізде Президент тапсырмасына сәйкес «Таза Қазақстан» республикалық экологиялық акциясы бастау алып, қарқынды тазалық жұмыстары жүргізілуде. Осы орайда ауданымызда да акция аясында аудан аумағын тазарту және абаттандыру мақсатында кең көлемде сенбілік ұйымдастырылды.
Тазалық жұмыстарына мемлекеттік мекемелердің қызметкерлері, жастар мен еріктілер жұмылдырылып, барлық кент және ауылдық округтер аумағында ауқымды жұмыстар атқарылды. Нақты айтқанда көшелер, саябақтар мен қоғамдық орындар тұрмыстық қалдықтардан тазартылып, жасыл желектер ретке келтірілді. Жиналған қоқыстар арнайы техникалармен аудан сыртына шығарылды. Сондай-ақ жол жиектері, жаяу жүргіншілер жолы мен аулалар тазартылып, кейбір аймақтарда көгалдандыру жұмыстары жүргізілді.
«Таза Қазақстан» экологиялық акциясы тек мемлекеттік қызметкерлерге жүктелген міндет емес. Бұған аудан тұрғындары да үн қосуы маңызды. Әр тұрғын өз ауласын, есік алдын қыстан шыққан қоқыстан тазартып, тазалықты сақтау қажет, яғни бұл іске барлық тұрғын да жауапты. Бір сөзбен айтқанда, аудан – баршаға ортақ мекен. Тазалық бар жерде ырыс, береке болары сөзсіз. Жинақылық – адамның көңілін көтеріп, жұмыс істеуге деген құлшынысын арттырып, өмірдің мәнін түсінуге жетелейді. Тазалықты сақтау, оған айрықша мән беру – әрбір адамның туған жеріне деген жанашырлықты білдіреді. Сондықтан ортақ үйіміздің көркеюі өз ауламызды, ауылымызды таза ұстаудан басталады.
Сенбілікке аудан әкімі Жандос Еркінбек қатысып, тазалық шараларының ұйымдастырылуын бақылап, санитарлық талаптардың сақталуын қадағалады. Ол қоршаған ортаны қорғау және ауданның көркейту жұмыстарына әр тұрғынның үлес қосуы маңызды екенін атап өтіп, бұл жұмыстардың жүйелі түрде жалғасатынын жеткізді.
Одан бөлек аудан басшысы кенттегі бірқатар әлеуметтік нысанды аралап, олардың қазіргі жайкүйімен танысты. Нысандардың инфрақұрылымдық жағдайына назар аударып, олардың сапалы әрі уақытылы жөндеуден өтуі қажеттігін атап өтті. Жауапты мекеме өкілдеріне ғимараттың жай-күйін бақылауда ұстап, белгіленген жұмыстарды мерзімінде орындау жөнінде міндеттер жүктеді.
Сонымен қатар кенттің бірқатар көшесін аралап, тұрғындардың талап-тілектерін тыңдады. Халық көтерген мәселелерді назарға алып, олардың шешілуі үшін тиісті сала басшыларына нақты тапсырмалар берді.
Ерсін СӘДУҰЛЫ
