Мектеп шеберханасы - кәсіпке қадам

Ауданға қарасты Төретам кентіндегі №85 мектепте оқушылар үшін кәсіпке қадам боларлық жаңа жоба қолға алыныпты. Жуырда ғана «Мектеп. Кәсіп. Болашақ» мектеп жобасы аясында «Бастау» кәдесыйлар жасау шеберхана кабинетінің ашылу салтанаты өтті. Бұл жобаның мақсаты – тұлғалық өсудің алғышарттарын қалыптастыра отырып, елімізге өз үлесін қоса білетін адал маман, кәсіп иесі болуға тәрбиелеу. Оқушыларды болашақта лайықты өмір деңгейіне көтерілу үшін кәсіптік бағдар беру, мамандықтардың қыр-сырын меңгерту, ойлау қабілеттері мен іскерлік қабілеттерін қалыптастыру. Ерте жастан балаларды кәсіпке баулу мақсатында жағдай жасау, оқушылар кәсібіне қолдау білдіру.

Шеберхананың ашылуына Төретам кенті әкімінің орынбасары С.Есқалиева, аудандық білім бөлімінің Байқоңыр қаласындағы сектор меңгерушісі Ж.Тұрарқызы, «Атамекен» кәсіпкерлер палатасының маманы Ж.Оразбекова, академик С.Жиенқұлов атындағы Байқоңыр жоғары колледж директорының орынбасары Н.Алимбаева қатысып, шеберхана лентасы қиылды. Қонақтар оқушылардың жұмыстарымен танысып, кәдесый жасау шығыны, пайдасы туралы ақпараттар алды.

– Өткен оқу жылында жоба аясында келісім-шарт жасасқан. Биыл жаңартып отырмыз. Біздің діттегеніміз – оқушыларды кәсіпке баулу, мамандық таңдауға бағыт ұсыну, қолөнерді насихаттау. Шеберхана еңбек пәндері мұғалімдерінің үйлестірілуімен жүргізіледі. Факультатив сабақтар аясында ұйымдастырылады. Қазір 50-60 оқушы қызығушылық танытып отыр. Ұстаздар кәдесыйлардың формасын жасап берсе, оқушы бояп, әрлейді. Бұл оларды еңбекке баулудың бір көрінісі секілді. Алайда мұның екінші бір қыры бар. Болашақта осы шеберханада шыңдалған оқушымыз таңдауын жасап, кәсіпкер болуы да ғажап емес. Сондықтан бұл жобаның берері мол, – дейді №85 орта мектептің директоры Жасұлан Жұматайұлы.

Түрлі кәдесый жасауды қолға алған шеберханаға әзірге мектеп директорының өзі демеушілік жасауда. Алдағы уақытта өнім түрін көбейтіп, жұмыс ауқымын үлкейтпек ниетте. Бала болашағы үшін қолға алынған жобаның жетістігі мол болсын дейміз.