Қармақшы аудандық прокуратурасының бастамасымен мемлекет пайдасына қаржы өндіру мәселесіне қатысты ведомствоаралық мәжіліс өткізілді.

Аудандық әкімдік, сот және уәкілетті орган басшылары мен жауапты қызметкерлері қатысқан мәжілісте әкімшілік айыппұл және мемлекет алдында басқа да берешектері қалыптасқан тұлғалардан тиісті қаражатты өндіру, қажет болған жағдайда құзырет шегінде мәжбүрлеу әрекеттерін қолдану шаралары талқыланды.

Төленбеген әкімшілік айыппұл қарыздар негізінен полиция мен мемлекеттік кірістер органдарында қалыптасқан.

Қалыптасқан қарыз бойынша әрбір уәкілетті орган басшылары мен жауапты тұлғалардың есептері тыңдалып, тиісті шараларды атқару жөнінде міндеттер жүктелді.

Мәжілісте әкімшілік айыппұлдардың өндірілуін қамтамасыз ету бойынша облыстық деңгейдегі органдармен ағымдағы жылдың басында жасалған меморандум талаптарының мүлтіксіз орындалуы талап етілді.

Одан бөлек, әкімшілік құқық бұзушылықтар бойынша уәкілетті органдар тәжірибесінде және сот тәжірибесінде туындайтын проблемалық мәселелер талқыланып, оларды болдырмау және алдын алу бағытындағы шаралар белгіленді.