Бұл қиындыққа да төтеп береміз

Қазақстан Республикасының Президенті Қасым-Жомарт Тоқаев су тасқыны салдарынан орын алған күрделі жағдайға орай Үндеу жолдады. Үндеуді республикалық телеарна арқылы толық тыңдап шықтық.

«Баршаңызға белгілі, қазір елімізде күрделі жағдай қалыптасып отыр. Қардың күрт еруіне байланысты аймақтарда су тасқыны болып жатыр. Бұл – табиғи апат. Мұндай ахуал ұзақ жылдан бері болмаған. Бұл көлемі жағынан соңғы 80 жылдан бергі ең ірі табиғи апат деуге болады. Жағдай өте күрделі болса да, біз қиындықты міндетті түрде еңсереміз, барлығын қалпына келтіреміз. Ең бастысы – азаматтардың амандығы. Тасқын судан зардап шеккен азаматтарға айтарым, мемлекет бірде-бір адамды ескерусіз қалдырмайды. Баршаңызға қаржылық және басқа да көмек беріледі. Су басқан аумақтарда құқықтық тәртіпті қамтамасыз ету қажет» деді Мемлекет басшысы.

Осындай қиын жағдайда уақытпен санаспай көмек басында жүрген барлық құтқарушыларға, тәртіп сақшыларына, волонтерлерге және апатпен күресуге атсалысып жатқан барша жұртқа алғыс айтқым келеді. Біздер де, әрқайсысымыз осы елдің азаматы ретінде қолымыздан келгенше көмек көрсетейік. «Бірлесе көтерген жүк жеңіл» демекші, бірлесіп бұл қиындықты да жеңеміз!